Amir Mati Tatalungkuik di Bawah Batang Jariang

Amir Mati Tatalungkuik di Bawah Batang Jariang

KAMPUANG DALAM, Pionir—Delmiati (34 tahun) rang kampuang Bintungan, Koto Tinggi, Nagari Gunung Padang Alai, Kacamatan V Koto Timur, tabik rarau katiko mandanga uda nan inyo cinto dikabakan maningga, Salasa sore, jam 16.00 WIB.

Batin rang padusi ko indak bisa manarimo kanyataan dari nan kuaso tu doh, sabab pagi hari sabalun barangkek pai bakarajo, udanyo tu masih bagarah-garah juo jo inyo sambia maminum kopi pagi.

Dari kaba nan didapek wartawan Pionir ko, si Amir ko barangkek dari rumahnyo manuju daerah Bituangan, Koto Tinggi Nagari Gunuang Padang Alai, Kacamatan V Koto Timur, Kabupaten Padang Pariaman, pado hari tu sakita jam 08.30 WIB untuak maambiak upah mamanjek batang Jariang punyo si Muni.

Kaba maningganyo si Amir (48 tahun) nan bakarajo maambiak upah mamanjek Jariang tu diakui dek Kapolsek Kampuang Dalam, AKP Kasman, S.Sos, MH katiko dihubungi dek wartawan koran ko, Kamih 26 Agustus 2021.

Kecek pak Kapolsek nan baparawakan tanang ko, korban tasarobok dek urang nan punyo batang Jariang alah tatungkuik siang hari sakitar jam 16.00 WIB, dakek batang Jariang nan bajarak satu satangah kilo meter dari rumah korban.

“Benar, korban meninggal karena terjatuh saat memenjat batang jengkol milik Murni di daerah Koto Tinggi,” kecek Kasman ko manjalehan.

Dikecekan dek Dansek ko, kajadian tu tajadi sekitar jam 16.00 WIB. Katiko tu rang punyo batang Jariang tu pai ka kabunnyo tu.

Tapi rang punyo kabun nan banamo Muni tu takajuik mancaliak si Amir sangkek tu alah tatilungkuik di dakek bantang Jariang.

Mancaliak kanyataan tu, si Muni ko langsuang mangabakan kajadian tu ka urang kampuang di sakitar tampek kajadian. 

Baitu mandapek kaba duka tu, rang kampuang barami-rami manyalamaik an si Amir ko dengan mambaok korban ko ka rumah bidan desa nan adoh dakek TKP. Sayangnyo nyawo korban indak bisa disalamaikan lai doh. (Firman Sikumbang)

iklan adsense